Hütt morgä äm nüüni simmer vu üserem Mentor Tschowanni, vum Schtützpunggt Eschäbärg mit sim Bus und Aahängger zur Riggetwilerstrass karred wordä. D Marianne, Emil, Heinz,Walo, Erich, Tschowanni & Ruedi händ sich dä mit äm Zruggbuuä vu dä Fröschäzüü beschäftiget. Innärä Schpitzäziit vumänä guätä Schtündli isch alles abbrochä und ufäm Aahängger gsi. Dr Heinz hätt sich dä nuch as excellänti Kopie vum Harald Nägeli entfaltet und diä Pfööl wo ich zur Chübelmarggiärig innätonnered ha, nuch mit Lüüchtschprei marggiärt. Nachhänä simmer wider zur Eschäbärgschtrass tüüsed um au dettä d Züü abzbrächä. Äs hät dä grad äs Päusäli gi und d Marianne hät feini Branschli uuspaggt und verteilt. Frisch gschtärcht hämmer wiiter demontiert und dr Plastigg uufgrolled bis äm Mittag. Dr Emil hät dä äs super Glüetli hänäklepft und mir händ üseri Würscht nu no chännä druufleggä. Äm Namittag simmer dä mit mänä Schrumpftrüppli, Tschowanni, Walo, Emil, Heinz & Ruedi noch ämäl zur Eschäbargschtrass gu färtig machä. Bim Schtüzzpunggt häts dä au nuch ä paar Meter gha zum abbuä. Alles verladä simmer zrugg zum Punggt, womer dä nuch all Barometer ( Fröschächübel ) für z nächscht Jaar putzt händ.
Ich glaubä mir händ wider ä intensiivä Tag gha bi schünschtem Wätter und chänd jetzä mit guätem Gwüssä gu d Eier färbä. ( Dr Heinz natüürli mit Schprei). Ich wünsche allnä Ränscher nuch ä schüünä Oschtärä und ä dä verseertä ä guäti Besserig. Ruedi
Nachwort via Whatsapp vom Giovanni:
Ciao Rangers,
hüt isch gkrampfet worde alli händ apackt und die Fröschlizün sind weg, d’chübeli gwäsche und bis nöchschts Jahr verstaut! Nomal viele Dank und bis gli, liebi Rangergrüess G.
Schreibe einen Kommentar