Bi härrlichem Früaligswätter hätt üüs dr Tschowanni mit sim Waldbus zum Iisazzort Choombärg ufäkarred. Nachem fassä vu dä Gablä hämmer los gleit. Schu bald sind diä erschtä Tröpfli durä Ruggä abägloffä. Dr Tschovanni hätt dä wider wiä wild ummäknatterät mit sinärä Motorsagi das üüs ja  nüd öppä d Büäzz uusgiäng. Aber das wär ja au suscht nüd dr Fall gsi . D Förschter und iri Mannschafft händ liibärämänt ganzi Arbett gleischtet. Zwüschedinä hätt üs dr Tschowanni zämäpfiffä für nä Miniature-Baumfellerkurs, was üüs ächlei verschnuufä lu hätt. I dr Pausä hätt dr Roli wider diä delikaatä Brügeli usäm Ruggsagg usäpuddlet was mir natüürli seer gschetzt händ.

Äm Mittag simmer dä zur faarbarä Kantinä disloziärt wo bereits dr Gorrgioff ä herrliche Gluäsä hännäzauberet hät wo dä bald Särvela und Original Glarnär Chalbärwürscht drauf bruzzlet händ. Womer dä all das Schwii und Chälberfuud gschpachtlät gha händ isch dä dr Kari mit dem uf jedä persüünli abgschtimmtä Käfi uuftrumpft. Au Glarner Paschteli gschpändiärt vum Jung-Ränscher sind schu bald nümmä ummä gsi. Äm Namittag simmer dä ufnä nüüä Arbetsplazz karred wordä wods dä au nuch zümftigg Büäzz hät für wiitäri Täg, wänn dä nüd öppä liibärämänt d Fröschä plözzli verwached und Gas gänd.

 

Äs Grüssli vum Zigerfrizz (Ruedi)

 

Written by Max_Schumacher

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert